எங்கு செல்வீர் ?

 

உலகெங்கும் பெருந்தொற்றாம்

உலவுகிறது காற்றில் பட்டாம்! - அட

என் ஊரில் நான் ராஜா

எங்கும் செல்வேன் நானும்!

கட்டுப்பாடாம் கடையடைப்பாம்

காலவரையின்றி ஊரடங்காம்! - அட

எவர்க்கடங்கா  காளை நானாப்பா

எங்கும் செல்வேன் நானும்!

மூச்சு விடவும் சிரமமாகுமாம்

முயன்று எழவே வாரமாகுமாம்! - அட

இளம் ரத்தம் எனக்கென்ன?

எங்கும் செல்வேன் நானும்!

ஊசிகள் தட்டுப்பாடாம்

சுடுகாடும் தட்டுப்பாடாம்! - அட

என்னை பார்க்க எனக்குத்தெரியும்

எங்கும் செல்வேன் நானும்!

கோடிகளில் மரணமாமே

கோவிட் தான் காரணமாமே! - அட

எனக்கு காது குத்தியாச்சு

எங்கும் செல்வேன் நானும்!

ஐயோ! அம்மா  என்னாச்சு

என்னைக் காண எந்திரிம்மா!! - ஐயோ

உன்னைப் பறிகொடுக்கவா 

எங்கும் சென்றேன் நானும் ? 

பறிகொடுத்தேன் பட்டுவிட்டேன் 

எங்கும் சென்றேன் நானும்!

நம்மை நம்மோரை காத்திடவே

எங்கும் செல்லாதீர் யாரும்!!!....

-செல்வகணபதி